மீண்டும் கிசு கிசு

கிசுகிசு 1

ஒரு வலைப்பூவுக்கே பதிவர்கள் ததிங்கனத்தோம் போட, நாலு வலைப்பூவில் தூள் கிளப்பும் ஒரு சிவக்கொழுந்து, பதிவிடும் ரகசியம் அம்பலமாகிவிட்டதாம். அவரின் புத்திசாலி மகள், தூங்கப்போகும் முன் அப்பாவுக்கே சொல்லும் கதைகளை அப்படியே பதிவாக்கி பேரைத் தட்டிக் கொண்டு போய் விடுகிறாராம். எனக்கும் அப்படி திவ்யமான மகள் இருந்தால் ,நான்கூட பத்துவலை மேய்ப்பேனே என்று வானவில் பெருமூச்சு விடுகிறதாம்.

கிசுகிசு 2

இரு கைகளையும் தூக்கி அண்மைக்காலம் வரை ஆசீர்வதித்துக் கொண்டிருந்த மகானின் பேர்கொண்ட பதிவர். அண்மையில் கையில் அறுவைசிகிச்சை செய்து கொண்டாலும் ஓய்வெடுக்காமல் பதிவில் தட்டச்சுகிறாராம். அவரிடம் அன்பு கொண்ட நண்பர்கள், இப்போதெல்லாம் அவரைப் பார்த்து பாடுவது “கைய வச்சுகிட்டு..... சும்மா இருடா..” என்ற பாடலைத்தானாம். இந்த நவரசப்பதிவர் முற்றிலும் குணமாகி தன் கைவரிசையை காட்ட பாபா அருளட்டும்..

கிசுகிசு 3

பதிவுலகின் பாசமலர் சிவாஜி, சாவித்திரி போன்று அண்ணா, தங்கச்சி என்று உருகி ஓடும் ஏழுவண்ணக்காரரும், வெளித்த பெண்ணும் உண்மையிலேயே உடன்பிறப்புகள் தானாம்.

SALT-MUTT-JUNCTION வலைப்பூவின் பின்புலத்தில் தெரியும் அவர்களிருவரின் படத்தில் காணப்படும் ஒரே முகஜாடை, இந்த உண்மையைக் காட்டிக் கொடுத்து விட்டது என்று நம் துப்பறியும் துரைசிங்கம் கண்டுபிடித்து விட்டாராம்.  

ஆடுரா ராமா ஆடு....

கிசுகிசு 4

மைன்ட் வாய்சோடு அடிக்கடி பேசும் பரபரப்பு பதிவர் ,வலையில் தன் முழுதிறமையும் வெளிப்படுவதில்லை என்று, தனி சேனலே துவங்க முடிவு செய்திருக்கிறாராம். பதிவர்கள் யாரும், தன் வலைப்பூவைதிறந்தவுடன் ,முதல் அரைமணி நேரம் கண்டிப்பாக இந்த சேனல் ஒளிபரப்பபாகுமாறு தொழில் நுட்பம் உண்டா என ஆராய்ந்து வருகிறாராம். அப்பாவி பதிவர்கள் கதிகலங்கி இருக்கிறார்கள். சேனல் பெயரை பதிவர்களே தேர்ந்தெடுக்கவும் வேண்டுகோள்விடப் போகிறாராம். பேரு இருந்தா  சொல்லுங்களேன் !

கிசுகிசு 5

வில்லேந்திய இந்த பதிவர் தன் பதிவிலும், கூட்டுப் பதிவிலும் தொடாத துறைகளே இல்லை. இருந்தாலும் அவர் இடும் பின்னூட்டங்களில் தான் அவர் மேதைமை அதிகம் வெளிப்படுகிறது என்று பதிவர்கள் நினைக்கிறார்கள்.

பின்னூட்டப் பெருமாளு??  

  

.